"Akulalar"ın gizlədildiyi dələduzluq işi - şirkət rəhbəri niyə yalan danışır?

Baxış sayı: 
39
1  
0  

 
Dələduzluqda ittiham edilən şirkət rəhbərinin məhkəməsi davam etdirilib.
 
Musavat.com xəbər verir ki, Bakı Ağır Cinayətlər Məhkəməsində dələduzluqda təqsirləndirilən "Bakı MTK"nın rəhbəri Emil Məhərrəmovun cinayət işi üzrə məhkəmə iclası keçirilib. Onunla birlikdə Eynur Xudiyev də müttəhimlər kürsüsünə çıxarılıb.
 
Hakim Mahmud Ağalarovun sədrliyi ilə keçirilən məhkəmə iclasında təqsirləndirilən şəxslər ifadə verib.
 
Emil Məhərrəmov ifadəsində deyib ki, "Bakı" MTK-nın qurucusu olmayıb. O, 2010-cu ildən MTK-ya rəhbərlik etdiyini deyib.
 
Hakimin sualına cavabında isə MTK-nın əvvəlki sahibini tanımadığını deyib.
 
Cavab məhkəməni qane etməsə də, Emil Məhərrəmov bu fikrində israr edib. O söyləyib ki, MTK-da satışla bağlı problemlər olanda o rəhbər təyin edilib.
 
Emil Məhərrəmov bir mənzili bir neçə nəfərə satmasını etiraf edib: "Bir səhvdir, olub. Bunu etiraf edirəm. Səhvsiz insan yoxdur".
 
O, zərəri yalnız azadlığa çıxdıqdan sonra ödəyə biləcəyini deyib.
 
Eynur Xudiyev isə MTK-da vəzifə tutmadığını, sadəcə makler kimi fəaliyyət göstərdiyini deyib.
 
Emil Məhərrəmov əlavə edib ki, ayrı-ayrı vətəndaşlardan aldığı pullardan Eynur Xudiyevə heç bir məbləğ verməyib.
 
Məhkəmə iclasında zərərçəkmiş Azər Məcidov da ifadə verib. O, bu iş üzrə qardaşının və qardaşı oğlunun da zərərçəkmiş olduğunu deyib.
 
Azər Məcidov təqsirləndirilən şəxslərin həbs edilməsini istəmədiyini deyib. O bildirib ki, Emil Məhərrəmov azadlığa çıxacağı halda onların pulunu qaytaracaq. Zərərçəkmiş daha əvvəl məhkəməyə gəlməməsinin səbəbini də bununla izah edib, bildirib ki, Emil Məhərrəmov onunla telefon danışığında zərəri ödəyəcəyini deyib, şikayətçi olmamasını istəyib. Zərərçəkmiş məhkəməyə şikayətinin olmaması ilə bağlı ərizə təqdim edib.
 
Bu iş üzrə maraqlı məqam ondan ibarətdir ki, təqsirləndirilən şəxslərin MTK-nın əvvəlki rəhbərliyinin və digər vəzifəli şəxslərinin adını çəkmirlər. Bu şəxslərin başqa bir cinayət işində də eyni məqam diqqət çəkmişdi. Zərərçəkmişlər deyirdilər ki, tutulan bu şəxslər vətəndaşları aldatmayıb. Onların sözlərinə görə, Emil və Eynur da bu proseslərdə iştirak etsələr də, əsas dələduzlar başqalarıdır. Zərərçəkmişlər həmin şəxsləri "akulalar" adlandıraraq onların kimlərinsə himayəsində gizləndiklərini bildirirlər.

 
Məhkəmə araşdırması davam etdirilir.
 
Bildirək ki, hər iki qarşı Cinayət Məcəlləsinin 178.3.2-ci (külli miqdarda ziyan vurmaqla dələduzluq) maddəsi ilə ittiham irəli sürülüb.
 
Məlum olub ki, bu iş üzrə 6 zərərçəkmiş şəxs var.
 
Xatırladaq ki, adı çəkilən MTK-dan dələduzluq işi ilə bağlı daha bir məhkəmə prosesi keçirilmişdi.
 
Şirkətin iki vəzifəli şəxsi Çingiz Bağırov və Eynur Xudiyev mənzilləri bir neçə nəfərə satmaqda ittiham edilirdilər.
 
Həmin məhkəmə prosesinin sonunda Çingiz Bağırov 14 il, Eynur Xudiyev isə 11 il azadlıqdan məhrum edilib.
 
Bundan başqa, təqsirləndirilənlərdən Çingiz Ç.Bağırov 14 il əvvəl quldurluq ittihamı ilə məhkum olunub. İttiham akıtına əsasən, “Bakı” MTK-nın vəzifəli şəxsləri Ç.Bağırovla E.Xudiyev başqasına satılan mənzili təkrarən bir neçə nəfərə sataraq dələduzluq ediblər.
 
Belə ki, onlar vətəndaş Ruslan Babayevin adına olan Bakı şəhəri, Yasamal rayonu, İ.Qutqaşınlı küçəsində yerləşən 6 nömrəli binanın 6-cı mərtəbəsində yerləşən 68 kvadratmetrlik mənzili 2014-cü il dekabrın 10-da Siyavuş Dadaşova 166 min 600 manata satıblar. Həmin mənzili dekabrın 30-da isə 180 min dollara Ramiz Hüseynova satıblar.
 
Həmin şəxslər bu işləri şirkətin İdarə Heyətinin sədri Emil Məhərrəmovla birgə həyata keçiriblər. Daha sonra onlar Rəşad Əliyevdən 144 min dollar, Fuad Babayevdən 135 min manat alaraq başqalarına satdıqları mənzili təkrar satıblar.
 
Bundan başqa, təqsirləndirilən şəxslər Ulduzə Cəbrayılovaya məxsus mənzili Eldar Rüstəmova 170 min manata, İmam Süleymanlıya məxsus mənzili isə Dilşad Məmmədovaya 99 min 500 manata sataraq dələduzluq ediblər.
 
Bildirək ki, bu iş üzrə zərərçəkmişlər arasında “Qarabağ”ın tanınmış sabiq futbolçusu, hazırda “Səbail” klubunda forma geyinən Rahid Əmirquliyev də var. Onun aldığı iki mənzil də başqa şəxslərə satılıb.
 
İlkin Muradov
Musavat.com

Загрузка...
Загрузка...